പൊൻകുന്നം ഇളങ്ങുളം എസ് എൻ ഡി പി ഗുരുമന്ദിരത്തിന് സമീപം മിഥുലാപുരിയിൽ ഉണ്ടായ വാഹനാപകടത്തിൽ യുവാവ് മരിച്ചു. ചിറക്കടവ് ഈസ്റ്റ് താവൂർ തെന്നറമ്പിൽ അനൂപ് രവി (27) ആണ് മരിച്ചത്.രാവിലെ 10 മണിയോടെയായിരുന്നു അപകടം. അനൂപ് സഞ്ചരിച്ച സ്കൂട്ടർ ഇന്നോവ കാറുമായി കൂട്ടിയിടിച്ചാണ് അപകടമുണ്ടായത്.അപകടത്തെ തുടർന്ന് അനൂപിനെ ഉടൻ തന്നെ കാഞ്ഞിരപ്പള്ളി ജനറൽ ആശുപത്രിയിൽ പ്രവേശിപ്പിച്ചെങ്കിലും മരണം സംഭവിച്ചിരുന്നു.പുനലൂർ മൂവാറ്റുപുഴ സംസ്ഥാന പാതയിലായിരുന്നു അപകടം
ഈരാറ്റുപേട്ട: ഈരാറ്റുപേട്ട ബ്ലോക്ക് പഞ്ചായത്ത് 2024-25, 2025-26 വാർഷിക പദ്ധതിയിൽ ഉൾപ്പെടുത്തി ആരംഭിച്ച വനിത ഫിറ്റ്നസ് സെന്റർ ജോസ് കെ. മാണി എം.പി. ഉദ്ഘാടനം ചെയ്തു. ബ്ലോക്ക് പഞ്ചായത്തംഗം ജെറ്റോ ജോസിന്റെ നിർദേശപ്രകാരം പണിപൂർത്തീകരിച്ച് പ്രവർത്തനം ആരംഭിക്കുന്ന വനിത ഫിറ്റ്നസ് സെന്ററിൽ പ്രമേഹം, പ്രഷർ, പക്ഷാഘാതം, തുടങ്ങിയ ജിവിതശൈലി രോഗങ്ങൾ മൂലം ഉണ്ടാകുന്ന ശാരീരിക ബലക്ഷയങ്ങൾ പരിഹരിക്കുന്നതിനും രോഗങ്ങൾ വരാതിരിക്കുന്നതിന് വേണ്ടി വ്യായാമം ചെയ്യുന്നതിന് ആവശ്യമുള്ള ഉപകരണങ്ങൾ സജ്ജമാക്കിയിട്ടുണ്ട്. കൈലാസം പ്രോഗ്രസ്സീവ് ലൈബ്രറി ഹാളിൽ നടന്ന ചടങ്ങിൽ ബ്ലോക്ക് പഞ്ചായത്ത് പ്രസിഡന്റ് മറിയാമ്മ ഫെർണാണ്ടസ് ചടങ്ങിൽ അധ്യക്ഷത വഹിച്ചു. മേലുകാവ് ഗ്രാമപഞ്ചായത്ത് പ്രസിഡന്റ് ജോസ് കുട്ടി ജോസഫ് മുഖ്യപ്രഭാഷണം നടത്തി. മേലുകാവ് ഗ്രാമപഞ്ചായത്ത് വാർഡ് മെമ്പറും പഞ്ചായത്ത് വൈസ് പ്രസിഡന്റുമായ ഷൈനി ജോസ്, ജെറ്റോ ജോസ് (ബ്ലോക്ക് പഞ്ചായത്ത് ഡിവിഷൻ മെമ്പർ), സാജൻ എ (സെക്രട്ടറി, ഈരാറ്റുപേട്ട ബ്ലോക്ക് പഞ്ചായത്ത്, അനൂപ് കെ കുമാർ (സി.പി.എം ലോക്കൽ സെക്രട്ടറി), ടി.ജെ ബഞ്ചമിൻ (കോൺഗ്രസ്സ് മണ്ഡലം പ്രസിഡന്റ്), ഷാജി ജോസഫ് (സി.പി.ഐ ലോക്കൽ സെക്രട്ടറി), ടിറ്റോ ടി മാത്യു (കേരള കോൺഗ്രസ്-എം മണ്ഡലം പ്രസിഡന്റ്), അരുൺദേവ്, മാത്യു ജോസഫ്, വിജയകുമാർ, റോയി ജോൺ പിണക്കാട്ട് (പ്രോഗ്രസ്സീവ് ലൈബ്രറി സെക്രട്ടറി) തുടങ്ങിയവർ ആശംസാ പ്രസംഗം നടത്തി. പ്രോഗ്രസ്സീവ് ലൈബ്രറി മ്യൂസിക് ക്ലബ്ബ് അംഗങ്ങളുടെ ഗാനമേളയും ഉണ്ടായിരുന്നു.
കോട്ടയം: കോട്ടയം കുറവിലങ്ങാട് എംസി റോഡിൽ ടൂറിസ്റ്റ് ബസ് മറിഞ്ഞ് അപകടം. ഒരാൾ മരിച്ചു. കണ്ണൂർ ഇരിട്ടി സ്വദേശിയായ സിന്ധു (45) ആണ് മരിച്ചത്. നിരവധി യാത്രക്കാർക്ക് പരിക്കേറ്റിട്ടുണ്ട്. ചീങ്കല്ലയിൽ പള്ളിക്ക് സമീപത്താണ് അപകടം ഉണ്ടായത്. തിരുവനന്തപുരത്ത് നിന്ന് ഇരിട്ടിയിലേക്ക് പോകുകയായിരുന്ന ബസാണ് അപകടത്തിൽപ്പെട്ടത്. പുലർച്ചെ 2 മണിയോട് കൂടിയാണ് അപകടം ഉണ്ടായത്. കണ്ണൂർ ഇരിട്ടി സ്വദേശികളാണ് ബസിലുണ്ടായിരുന്നത്. ചീങ്കല്ലയിൽ പള്ളിക്ക് സമീപമുള്ള വളവ് കടക്കുന്നതിനിടെ വാഹനം നിയന്ത്രണം വിട്ട് മറിയുകയായിരുന്നു. 49 പേർ ബസിലുണ്ടായിരുന്നു. ഇതിൽ 18ഓളം പേർക്കാണ് പരിക്കേറ്റത്. ഇവരെ കോട്ടയം മെഡിക്കൽ ആശുപത്രിയിലും സമീപത്തെ സ്വകാര്യ ആശുപത്രിയിലുമായി പ്രവേശിപ്പിച്ചിട്ടുണ്ട്.
പാലാ കൊച്ചിടപ്പാടിയിൽ റോഡ് കുറുകെ കടക്കവേ ബൈക്ക് ഇടിച്ച് ഗുരുതരമായി പരിക്കേറ്റ വയോധികൻ മരണമടഞ്ഞു... മൂന്നാനി ഉള്ളാട്ടിൽ ജോസ് ജോസഫ് (ജോണി 72) ആണ് മരിച്ചത്. ഏറ്റുമാനൂർ പൂഞ്ഞാർ സംസ്ഥാന പാതയിൽ കൊച്ചിപ്പാടി ഐഎംഎ ജംങ്ഷനിൽ ഇന്നലെ 1.45നായിരുന്നു അപകടം. ജോസ് ജോസഫിനെ ഇടിച്ചിട്ട ശേഷം നിർത്താതെ ഓടിച്ചു പോയ ബൈക്ക് പിന്നീട് കോടതി ജംഗ്ഷനിലും അപകടത്തിൽപ്പെട്ടു. പാലാ പൊലിസ് അന്വേഷണം ആരംഭിച്ചു.
ഈരാറ്റുപേട്ട: ആക്രി ആപ്പുമായി നഗരസഭ കൈകോർത്ത്, സാനിറ്ററി പാഡുകൾ, ബേബി ഡയപ്പറുകൾ, യൂറിൻ ബാഗുകൾ, ട്യൂബുകൾ, മെഡിസിൻ സ്ട്രിപ്പുകൾ, ഡ്രസിങ് കോട്ടൺ, മരുന്നുകൾ, ഗ്ലൗസുകൾ, മാസ്കുകൾ തുടങ്ങിയ മാലിന്യം സംസ്കരിക്കാൻ നഗരസഭയിൽ സംവിധാനമായി. ഇതിനായി സംസ്ഥാന മാലിന്യ നിർമ്മാർജ്ജന രംഗത്ത് സുസ്ഥിരമായി പ്രവർത്തിക്കുന്ന അക്രി ആപ്പുമായി നഗരസഭ കൈകോർക്കുന്നു. ശുചിത്വ മിഷൻ അംഗീകൃത ഗാർഹിക സാനിറ്ററി മാലിന്യം ശേഖരിക്കുന്ന സ്ഥാപനമാണ് ആക്രി ഇംപാക്ട് പ്രൈവറ്റ് ലിമിറ്റഡ്. അടുത്ത ദിവസം മുതൽ നഗരസഭ പ്രദേശത്ത് ഇത്തരത്തിലുള്ള മാലിന്യ ശേഖരങ്ങൾ നടത്തുന്ന പ്രവർത്തനങ്ങൾ ഏജൻസി ആരംഭിക്കുമെന്ന്, ക്ലിൻ സിറ്റി മാനേജർ ടി. രാജൻ, സീനിയർ പബ്ലിക് ഹെൽത്ത് ഇൻസ്പെക്ടർ വിശ്വൻ പി.എസ് എന്നിവർ അറിയിച്ചു. ടോൾ ഫ്രീ നമ്പറായ 0803140504 ലോ വാട്സപ്പ് നമ്പറായ 7591911110 ലോ ബന്ധപ്പെട്ടാൽ ഏജൻസി വീടുകളിൽ എത്തി ബയോമെഡിക്കൽ മാലിന്യം സംസ്കരിക്കും. തുടർന്ന് അമ്പലമുകളിലുള്ള കേരള എൻവിറോ ഇൻഫ്രാസ്ട്രക്ചർ ലിമിറ്റഡിന്റെ പ്ലാന്റിലെത്തിച്ച് സംസ്കരിക്കും. ഡയപ്പർ മാലിന്യ ശേഖരണത്തിനെത്തുന്ന വാഹനത്തിന്റെ ഫ്ലാഗ് ഓഫ് കർമം നഗരസഭ ചെയർപേഴ്സൺ സുഹറ അബ്ദുൽ ഖാദർ നിർവ്വഹിക്കും, ചടങ്ങിന് വൈസ് ചെയർമാൻ അൻസർ പുള്ളോലിൽ അധ്യക്ഷത വഹിക്കും, ആരോഗ്യ കാര്യ സ്റ്റാന്റിങ് കമ്മറ്റി ചെയർപേഴ്സൺ ഷെഫ്ന അമീൻ സ്വാഗതമാശംസിക്കും. സ്റ്റാന്റിംഗ് കമ്മറ്റി ചെയർമാൻമാർ, കൗസിലർമാർ എന്നിവർ സംബന്ധിക്കും.
കോട്ടയം :കുമ്മനം മടക്കണ്ടയിൽ മൂന്നു മാസം പ്രായമുള്ള ആൺകുഞ്ഞിനെ സുഹൃത്തിന് വിൽക്കാൻ ശ്രമിച്ച് പിതാവ്.കുമ്മനത്തെ സ്വകാര്യ സ്ഥാപനത്തിൽ ജോലി ചെയ്യുന്ന അസം സ്വദേശികളായ ദമ്പതിമാരുടെ ആൺകുഞ്ഞിനെയാണ് വിൽക്കാൻ ശ്രമം നടന്നത്. ഈരാറ്റുപേട്ടയിൽ ബാർബർ ഷോപ്പിൽ ജോലി ചെയ്യുന്ന ഇതര സംസ്ഥാന തൊഴിലാളിയാണ് കുട്ടിയെ വാങ്ങാൻ ശ്രമിച്ചത്, ഇവർക്ക് ആൺ കുഞ്ഞുങ്ങൾ ഇല്ല എന്ന കാരണത്തെ തുടർന്നാണ് കുഞ്ഞിനെ പണം നൽകി വാങ്ങാനുള്ള ശ്രമം നടത്തിയത്. കുട്ടിയെ പിതാവ് വില്പന യുടെ കാര്യം ഫോണിൽ സംസാരിക്കുന്നത് കേട്ട കുഞ്ഞിന്റെ മാതാവ് വാർഡ് മെമ്പറെ വിവരം അറിയിച്ച തോടെയാണ് സംഭവം പുറത്തറിയുന്നത്.കുമരകം പൊലീസ് കസ്റ്റഡിയിൽ എടുത്ത മാതാപിതാക്കളെ ചോദ്യം ചെയ്ത് വരികയാണ്.സംഭവത്തിൽ കുട്ടിയുടെ പിതാവും ഇടനിലക്കാരനും വാങ്ങാൻ ശ്രമിച്ചയാളും പൊലീസ് കസ്റ്റഡിയിലാണ്.
ഈരാറ്റുപേട്ട.അഡ്വ. സെബാസ്റ്റ്യൻ കുളത്തുങ്കൽ എംഎൽഎ നേതൃത്വം നൽകുന്ന സന്നദ്ധ-സേവന സംഘടനയായ എംഎൽഎ സർവീസ് ആർമി പൂഞ്ഞാറിന്റെ നേതൃത്വത്തിൽ പൂഞ്ഞാർ നിയോജകമണ്ഡലത്തിലെ വിവിധ പഞ്ചായത്തുകളിലായി 10 നിർധന കുടുംബങ്ങൾക്ക് ഭവനകൾ നിർമ്മിച്ചു നൽകുന്നു. വിവിധ കമ്പനികളുടെ സിഎസ്ആർ ഫണ്ടും, ഉദാരമതികളായ വ്യക്തികളുടെ സ്പോൺസർഷിപ്പിലൂടെയും മറ്റും ധനസമാഹരണം നടത്തിയാണ് ഭവനങ്ങൾ നിർമ്മിച്ചു നൽകുന്നത്. ഈ മാസം 27 -)o തീയതിയ്ക്കും നവംബർ 3-)o തീയതിക്കും ഇടയിലായി പല ദിവസങ്ങളിലായി 10 പത്തു വീടുകളുടെയും ശിലാസ്ഥാപന കർമ്മം അതാത് സ്ഥലങ്ങളിൽ അഡ്വ. സെബാസ്റ്റ്യൻ കുളത്തുങ്കൽ എംഎൽഎ നിർവഹിക്കും. ജനപ്രതിനിധികളും, പൊതുപ്രവർത്തകരും, എംഎൽഎ സർവീസ് ആർമി ഭാരവാഹികളും പങ്കെടുക്കും. താഴെപ്പറയുന്ന പ്രകാരമാണ് ശിലാസ്ഥാപന കർമ്മങ്ങൾ നിർവഹിക്കുക. 27-)o തീയതി രാവിലെ 11 മണിക്ക് ഈരാറ്റുപേട്ട കടുവാമുഴിയിലും, ഉച്ചകഴിഞ്ഞ് 2 മണിക്ക് പൂഞ്ഞാർ തെക്കേക്കരയിൽ കല്ലേക്കുളത്തും, 29-)o തീയതി രാവിലെ 10:30 ന് പൂഞ്ഞാർ തെക്കേക്കര- ചേരിമലയിലും, 11:30 ന് പൂഞ്ഞാർ ടൗൺ ഭാഗത്തും, ഉച്ചകഴിഞ്ഞ് 12.30 ന് ചേന്നാടും,1 മണിക്ക് പൂഞ്ഞാർ - മണിയംകുളത്തും , 31-)o തിയതി ഉച്ചകഴിഞ്ഞ് 03:30 ന് തീക്കോയി- മംഗളഗിരിയിലും ,3-)o തിയതി രാവിലെ 10 മണിക്ക് കൂവപ്പള്ളിയിലും, 11 മണിക്ക് എരുമേലി ചേനപ്പാടിയിലും, ഉച്ചകഴിഞ്ഞ് 3 മണിക്ക് പൂഞ്ഞാർ മണിയംകുന്നിലും നിർമ്മിച്ചു നൽകുന്ന ഭവനങ്ങളുടെ ശിലാസ്ഥാപന കർമ്മങ്ങൾ നടക്കും .
പാലാ തൊടുപുഴ റോഡിൽ ഐങ്കൊമ്പിൽ അപകടം. നിയന്ത്രണം വിട്ട കാർ ടൈൽ കടയിലേക്ക് ഇടിച്ചുകയറിയാണ് അപകടമുണ്ടായത്. രാവിലെ എട്ടരയോടെ ആയിരുന്നു അപകടം. പാലാ ഭാഗത്ത് നിന്നും വന്ന കാർ ഓടിച്ചിരുന്നയാൾ ഉറങ്ങിപ്പോയതാണ് അപകടകാരണം. വാഹനത്തിൽ ഉണ്ടായിരുന്നവർ പരിക്കേൽക്കാതെ രക്ഷപ്പെട്ടു. അരിക്കുഴ സ്വദേശിയുടേതാണ് വാഹനം. പാലായിലെ സ്വകാര്യ ആശുപത്രിയിൽ പോയി മടങ്ങും വഴിയാണ് അപകടം. തറയോടുകൾ നിർമ്മിക്കുന്ന സ്ഥാപനത്തിലേക്ക് ആണ് കാർ ഇടിച്ചു കയറിയത്. റോഡിനും വ്യാപാരസ്ഥാപനത്തിനും ഇടയിലുള്ള ഓടയിലേക്ക് കാർ പതിക്കുകയും ചെയ്തു. വ്യാപാര സ്ഥാപനത്തിന് മുമ്പിൽ ഡിസ്പ്ലേ ചെയ്തിരുന്ന ടൈലുകൾ വാഹനം ഇടിച്ചു തകർന്നു.
