തിരുവനന്തപുരം:സംസ്ഥാനത്തെ സ്കൂളുകളിലെ ക്രിസ്മസ് പരീക്ഷ തദ്ദേശ തെരഞ്ഞെടുപ്പിന് ശേഷം നടക്കും. ഡിസംബർ 15 മുതൽ 23 വരെയാണ് പരീക്ഷകൾ നടക്കുക. അഞ്ചു മുതൽ പത്താം ക്ളാസുവരെയുള്ള കുട്ടികൾക്കാണ് ഈ ടൈംടേബിൾ. ഒന്നു മുതൽ നാലുവരെ ക്ളാസുകൾക്ക് 17 മുതൽ 23 വരെയാണ് പരീക്ഷ. ഡിസംബർ 9, 11 തീയതികളിലെ വോട്ടെടുപ്പും 13 നുള്ള വോട്ടെണ്ണൽ കണക്കിലെടുത്താണ് പരീക്ഷാ തീയതി തീരുമാനിച്ചത്. ഡിസംബർ 24 മുതലാണ് ക്രിസ്മസ് അവധി
കോട്ടയം: റവന്യൂജില്ലാ സ്കൂള് കലോത്സവം നവംബര് 25 മുതല് 28 വരെ കോട്ടയം നഗരത്തിലെ എട്ട് വിദ്യാലയങ്ങളില് വച്ച് നടക്കും. ജില്ലാ കളക്ടര് ചേതന്കുമാര് മീണ കലോത്സവ ലോഗോ പ്രകാശനം ചെയ്തു. കളക്ടറുടെ ചേംബറില് നടന്ന ചടങ്ങില് വിദ്യാഭ്യാസ ഉപഡയറക്ടര് ഹണി ജി. അലക്സാണ്ടര്, വിവിധ കമ്മിറ്റികളുടെ കണ്വീനര്മാരായ ആര്. ജിഗി, ബിനു എബ്രഹാം,ആര്. രാജേഷ്, അനന്തകൃഷ്ണന് എന്നിവര് പങ്കെടുത്തു.
തിരുവനന്തപുരം: എന്യൂമറേഷന് ഫോം സ്വീകരിക്കല് സമയത്തില് മാറ്റമുണ്ടാവില്ലെന്ന് തിരഞ്ഞടുപ്പ് കമ്മീഷന്. ഡിസംബര് നാലിനകം പൂര്ത്തിയാക്കണം എന്നാണ് നിര്ദേശം. എസ്ഐആറിനെതിരായ പ്രതിഷേധം കനക്കുന്ന സാഹചര്യത്തിലാണ് തിരഞ്ഞടുപ്പ് കമ്മീഷന്റെ നിര്ദേശം. ഫോം അപ്ലോഡ് ചെയ്യുന്നതിലെ സാങ്കേതിക പ്രശ്നം പരിഹരിക്കാന് വൈഫൈ സൗകര്യമുള്ള ഇടങ്ങള് സജ്ജമാക്കണമെന്ന് കലക്ടര്മാര്ക്ക് മുഖ്യ തിരഞ്ഞെടുപ്പ് ഓഫീസര് നിര്ദേശം നല്കി. അതേസമയം, എസ്ഐആര് നിര്ത്തിവെക്കണമെന്നാവശ്യപ്പെട്ട് കേരളം സുപ്രിംകോടതിയെ സമീപിച്ചു. തദേശ തിരഞ്ഞെടുപ്പ് കഴിയുംവരെ നിര്ത്തണമെന്നാണ് ആവശ്യം. ചീഫ് സെക്രട്ടറി ഡോ. ജയതിലകാണ് എസ്ഐആര് നടപടികള് നിര്ത്തിവയ്ക്കണമെന്നാവശ്യപ്പെട്ട് സുപ്രിം കോടതിയെ സമീപിച്ചത്. എസ്ഐആറും തദേശ തിരഞ്ഞെടുപ്പ് നടപടികളും ഒരേസമയം നടത്തിയാല് ഭരണസംവിധാനം സ്തംഭിക്കുമെന്നും ഹരജിയില് ഉന്നയിക്കുന്നു. തിരഞ്ഞെടുപ്പ് നടക്കേണ്ടത് ഭരണഘടനാപരമായ ബാധ്യതയാണെന്നും ഡിസംബര് 21 വരെ നിര്ത്തിവെക്കണമെന്നുമാണ് ഹരജിയിലെ ആവശ്യം. എസ്ഐആര് നിര്ത്തിവെക്കണമെന്ന് ആവശ്യപ്പെട്ട് ഉത്തര്പ്രദേശ് കോണ്ഗ്രസ് കമ്മിറ്റിയും ഇന്ന് സുപ്രിം കോടതിയെ സമീപിക്കും. തദ്ദേശ തിരഞ്ഞെടുപ്പിന്റെ തിരക്കുകളില് നില്ക്കേ ധൃതിപ്പെട്ട് എസ്ഐആര് നടപ്പാക്കുന്നത് ഒഴിവാക്കണമെന്നും നടപടികള് നിര്ത്തിവെക്കണമെന്നും രാഷ്ട്രീയ പാര്ട്ടികള് ഒരുപോലെ ആവശ്യപ്പെട്ടതാണ്. എന്നിട്ടും തിരഞ്ഞെടുപ്പ് കമ്മീഷന് എസ്ഐആര് തിരക്കിട്ട് നടപ്പാക്കുന്നതിനു പിന്നില് ദുരുദ്ദ്യേശമുണ്ടെന്നാണ് ആരോപണം. കണ്ണൂര് ഏറ്റുകുടുക്കയില് ജോലി സമ്മര്ദം മൂലം അനീഷ് ജോര്ജെന്ന ബിഎല്ഒ ജീവനൊടുക്കിയ പശ്ചാത്തലത്തില് സംസ്ഥാന വ്യാപക പ്രതിഷേധത്തിന് തുടക്കം കുറിച്ചിരിക്കുകയാണ് സര്വീസ് സംഘടനകള്. വിഷയത്തെ നിയമപരമായി നേരിടാനാണ് സര്വീസ് സംഘടനകളുടെ തീരുമാനം.
ഈരാറ്റുപേട്ട .നഗരസഭയിൽ മൽസരിക്കുന്ന മുസ്ലിം ലീഗ് സ്ഥാനാർത്ഥികളെ മുസ്ലിം ലീഗ് ജില്ലാ പ്രസിഡൻ്റ് അസീസ് ബഡായിലിൽ പ്രഖ്യാപിച്ചത്.ഈരാറ്റുപേട്ട ലീഗ് ഹൗസിൽ ചേർന്ന യോഗത്തിൽ നഗരസഭാ മുസ്ലിം ലീഗ് പ്രസിഡൻ്റ് കെ.എ മുഹമ്മദ് ഹാഷിം അധ്യക്ഷത വഹിച്ചു. ജില്ലാ പ്രസിഡൻ്റ് അസീസ് ബഡായിൽ യോഗം ഉദ്ഘാടനം ചെയ്തു.മുസ്ലിം ലീഗ് ജില്ലാ ജനറൽ സെക്രട്ടറി റഫീഖ് മണിമല മുഖ്യപ്രഭാഷണം നടത്തി, ട്രഷറർ കെ.എ.മുഹമ്മദ് അഷറഫ് ആമുഖ പ്രഭാഷണം നടത്തി. മുസ്ലിം ലീഗ് സംസ്ഥാന സെക്രട്ടറിയേറ്റ് മെമ്പർ അജ്മൽ ഖാൻ , എം.പി.സലീം ,വി പി മജീദ് ,അഡ്വ.പീരു മുഹമ്മദ് ഖാൻ , റാസി ചെറിയ വല്ലം., കണ്ടത്തിൽ സിറാജ് ,പി .എം അബ്ദുൽ ഖാദർ ,ഷഹു ബാനത്ത് ടീച്ചർ എന്നിവർ പ്രസംഗിച്ചുമുസ് ലിം ലീഗ് കൂടുതലും യുവാക്കളെയാണ് രംഗത്തിറക്കിയിരിക്കുന്നത് 29 അംഗ കൗൺസിലിൽ മുസ്ലിം ലീഗ് 16 സീറ്റിലാണ് മൽസരിക്കുന്നത്.ഈരാറ്റുപേട്ട നഗരസഭയിലെ യൂ.ഡി.എഫ് സ്ഥാനാർത്ഥികൾ വ്യാഴാഴ്ച രാവിലെ നോമിനേഷൻ നൽകും മുസ്ലിം ലീഗ് സ്ഥാനാർത്ഥികൾ വാർഡിൻ്റെ നമ്പർ, വാർഡി ന്റെ പേര്, സ്ഥാനാർത്ഥിയുടെ പേര് ക്രമത്തിൽ ചുവടെ:- 2- കല്ലൂത്താഴം -റസ്ന ഹസീർ 3- വട്ടക്കയം - കെ.എ.മാഹിൻ 4- നടുപറമ്പ് -ബീമാ നാസർ 5- മുരിക്കോലി - പി .എം. അബ്ദുൽ ഖാദർ 9- കാരയ്ക്കാട് - സി.പി. അബ്ദുൽ ബാസിത്ത് 10- തേവരുപാറ -അഫ്സൽ വെള്ളൂപറമ്പിൽ 11- കുറ്റിമരംപറമ്പ് .ഷക്കീല ടീച്ചർ 12-' പത്താഴപ്പടി .റഷീദ് അണ്ണായിപ്പറമ്പിൽ 14- 'മുളന്താനം .അമീൻ പിട്ടയിൽ 15- കൊല്ലംപറമ്പ് .അബ്സാർ മുരിക്കോലിൽ 16- സഫാ നഗർ .തസ്ലിൻ സിറാജ് 17- കുഴിവേലി .അഡ്വ വി പി . നാസർ 18- ശാസ്താംകുന്ന് .സൈഫുനിസ സാദിക്ക് 19 മറ്റയ്ക്കാട് .സാജിദ് ഇഞ്ചക്കാട് 20- വഞ്ചാങ്കൽ .നാസിയ നസീർ 21- ടൗൺ .അൻവർ അലിയാർ
എരുമേലി കണമലയ്ക്ക് സമീപം ശബരിമല തീർത്ഥാടകർ സഞ്ചരിച്ച ബസ് നിയന്ത്രണം വിട്ട് റോഡിൽ വട്ടം മറിഞ്ഞു. കർണാടകയിൽ നിന്നുള്ള തീർത്ഥാടകർ സഞ്ചരിച്ച ബസാണ് അപകടത്തിൽപ്പെട്ടത്. പരുക്കേറ്റവരിൽ 4 പേരെ എരുമേലിയിലെ ആശുപത്രിയിൽ പ്രവേശിപ്പിച്ചു..ബസിൽ മുപ്പതോളം തീർത്ഥാടകരാണ് ഉണ്ടായിരുന്നത്.ആരുടെയും പരുക്ക് ഗുരുതരമല്ല. ഉച്ചകഴിഞ്ഞ് 2 മണിയോടെയായിരുന്നു അപകടം. ഇറക്കം ഇറങ്ങി വന്ന ബസ് നിയന്ത്രണം വിട്ട് റോഡിന്റെ സൈഡിലുള്ള തിട്ടയിലിടിച്ച ശേഷം റോഡിൽ വട്ടം മറിയുകയായിരുന്നു. തീർത്ഥാടന പാതയിൽ ഇതോടെ ഗതാഗതവും തടസപ്പെട്ടു. മോട്ടോർ വാഹന വകുപ്പും പോലീസും ചേർന്ന് ബസ് റോഡിൽ നിന്ന് നീക്കാൻ ശ്രമം നടത്തുകയാണ്
കോട്ടയം തലനാട് പഞ്ചായത്ത് ചോനമലയിൽ കടന്നൽ കുത്തേറ്റ് മധ്യവയസ്കൻ മരിച്ചു. താളനാനിക്കൽ ജസ്റ്റിൻ (50) ആണ് മരിച്ചത്. സ്വന്തം കൃഷിയിടത്തിൽ ജോലിയിൽ ഏർപ്പെട്ടിരിക്കെ കടന്നൽ ആക്രമിക്കുകയായിരുന്നു. സംസാരശേഷിയില്ലാത്ത ആളാണ് ജസ്റ്റിൻ. ഗുരുതരമായി പരിക്കേറ്റ ജസ്റ്റിൻ ഓടി സമീപത്ത് വീട്ടിലെത്തി. തുടർന്ന് തലനാട് സബ് സെൻന്ററിലേക്ക് എത്തിച്ചു. അപ്പോഴേക്കും ശരീരം നിറം മാറിയിരുന്നു. തുടർന്ന് ഈരാറ്റുപേട്ടയിലെ സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവിച്ചു. മൃതദേഹം പാലാ ജനറൽ ആശുപത്രിയിൽ പോസ്റ്റ്മോർട്ടം നടത്തും.
എസ്ഐആറിനെതിരെ സംസ്ഥാന സർക്കാർ സുപ്രിം കോടതിയിൽ. ചീഫ് സെക്രട്ടറി ജയതിലക് ആണ് സുപ്രിം കോടതിയെ സമീപിച്ചത്.എസ്ഐആർ നടപടികൾ നിർത്തിവയ്ക്കണമെന്ന് ആവശ്യപ്പെട്ടാണ് ചീഫ് സെക്രട്ടറി സുപ്രിം കോടതിയെ സമീപിച്ചിരിക്കുന്നത്.തദ്ദേശ തെരഞ്ഞെടുപ്പ് തിരക്കുകളിൽ നിൽക്കേ ധൃതിപ്പെട്ട് എസ്ഐആർ നടപ്പാക്കുന്നത് ഒഴിവാക്കണമെന്നും നടപടികൾ നിർത്തിവെക്കണമെന്നും രാഷ്ട്രീയ പാർട്ടികൾ ഒരുപോലെ ആവശ്യപ്പെട്ടതാണ്.എന്നിട്ടും തെരഞ്ഞെടുപ്പ് കമ്മീഷൻ എസ്ഐആർ തിരക്കിട്ട് നടപ്പാക്കുന്നതിന് പിന്നിൽ ദുരുദ്ദ്യേശമുണ്ടെന്നാണ് ആരോപണം.
കോട്ടയം: തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പുമായി ബന്ധപ്പെട്ട് കോട്ടയം ജില്ലയിൽ മീഡിയ റിലേഷൻസ് സമിതി രൂപീകരിച്ചു.സംസ്ഥാന തെരഞ്ഞെടുപ്പ് കമ്മീഷൻ മാധ്യമങ്ങൾക്കായി നൽകിയിട്ടുള്ള മാർഗ്ഗനിർദേശങ്ങൾ പാലിക്കപ്പെടുന്നുണ്ടെന്ന് ഉറപ്പാക്കുകയാണ് സമിതിയുടെ ചുമതല. ജില്ലാ കളക്ടർ ചേതൻ കുമാർ മീണ ചെയർമാനായ സമിതിയുടെ കൺവീനർ ജില്ലാ ഇൻഫർമേഷൻ ഓഫീസർ ജസ്റ്റിൻ ജോസഫാണ്. ഇൻഫർമേഷൻ-പബ്ലിക് റിലേഷൻസ് വകുപ്പ് മേഖലാ ഡെപ്യൂട്ടി ഡയറക്ടർ കെ.ആർ. പ്രമോദ് കുമാർ, ജില്ലാ ലോ ഓഫീസർ ടി.എസ്. സബി, ജില്ലാ ഇൻഫർമാറ്റിക്സ് ഓഫീസർ കെ.ആർ. ധനേഷ്, കോട്ടയം പ്രസ് ക്ലബ്ബ് പ്രസിഡന്റ്് അനീഷ് കുര്യൻ എന്നിവർ അംഗങ്ങളാണ്. മാധ്യമങ്ങൾക്കുള്ള നിർദേശങ്ങളുടെ ലംഘനം സംബന്ധിച്ച പരാതികളിൽ തീർപ്പുകൽപ്പിക്കുന്നത് ഈ സമിതിയായിരിക്കും. സമിതിയുടെ കീഴിൽ മാധ്യമ നിരീക്ഷണത്തിനായി കളക്ടറേറ്റിൽ പ്രത്യേക ക്രമീകരണം ഏർപ്പെടുത്തിയിട്ടുണ്ട്. ഫോൺ നമ്പർ-0481 2562558, ഇമെയിൽ-mrcktm2025@gmail.com
